معانا زميل في القسم يتبرع بوقته، يُتابع الغيابات ويُسجّل الاحتياطات بالورقة والقلم، ويحفظ في ذهنه: منو جاء دوره؟ ومنو ما جاء بعد؟ الأولوية لمنو؟ وهالشيء ما كان من مهامِه، كان يحاول تنظيم الفوضى قد ما يقدر.
هالمشهد مو استثناء، بعض المدارس تسجّل بورقة وقلم، وبعضها تستخدم الوورد والبعض الآخر إكسل، وأكيد اللي ما عندهم احتياطات كثيرة، الذاكرة تكفيهم، وهم المحسودون :)
ممكن يكون موجود نظام إلكتروني لهالشيء ولكن ما شفته بعد.
منصة زميلي بدأت من هالنقطة بالضبط، لأن وقت المعلم المسؤول عن الاحتياط يستحق أفضل من دفتر وقلم.
في سبتمبر 2025 أطلقنا النسخة الأولى عبارة عن جدول رقمي بسيط. وبعد أشهر من التشغيل اتضح إن الأساس يحتاج إعادة بناء كاملة، مو ترقية.
في الإصدار v1.5.0 انتقلنا لـ Next.js 15 وكتبنا طبقة حماية مخصصة، كل طلب يدخل للنظام يمر في ثلاث محطات.
هل الطلب من الكويت؟
هل التوكن صحيح؟
هل ملف المستخدم مكتمل؟
أي محطة تفشل، الطلب يوقف.
وعلى هالأساس بنينا كل شيء بعده.
والنظام مبني على رزنامة وزارة التربية، يعني يعرف الإجازات والفترات الدراسية.
بياناتك ملكك
أكبر مخاوف أي مدرسة قبل ما تسجل في أي نظام لو قررت أغير، وين تروح بياناتي؟
في الإصدار v1.7.0 أجبنا على هالسؤال بثلاث أدوات
استيراد بيانات المعلمين بملفات إكسل، بدل ما تدخّل كل معلم يدوياً.
رفع الجدول الدراسي كاملاً دفعة وحدة، النظام يقراه ويهيئ كل شيء.
نسخة احتياطية بصيغة JSON تنزّلها متى بغيت وتستعيدها كاملة.
الفكرة إن مفاتيح النظام بيدك.
البيانات آمنة، لكن التوزيع كان لا يزال يحتاج منطقاً.
عدالة التوزيع
هالمنطق ما كان موجود من أول يوم، بُني في v1.8.0 بعد جم شهر من التشغيل.
عقل النظام هو العدالة، لكن شلون أترجم العدالة؟
التوزيع اليدوي مُعرّض للنسيان وأحياناً للمحاباة، مو شرط تكون المحاباة بنيّة شينة، لكن بالنهاية البشر يتأثرون، بنيت مصفوفة قرار، دورها تحسب لكل معلم متاح درجة أولوية بناء على أربعة معايير
كل معلم غاب مرة صار مديون احتياط، النظام يحسب الفرق بين غياباته واحتياطاته، اللي عنده دين أكبر، الأولويته تكون أعلى.
اللي نصابه أعلى أولويته أقل، النظام ما يكلّف اللي عنده حصص أكثر.
اللي ياخذ ثلاثة احتياطات في هالأسبوع، نقاطه تصير صفر، النظام راح يحميه من الضغط.
كلما طالت الفترة من آخر احتياط أخذه، كانت أولويته أعلى، والسقف أربعة عشر يوماً.
الزبدة ماكو اختيار لكن فيه حساب.
تبي تشوف شلون يفكر النظام؟
بطّلت نواة للتجربة، تقدر تجرب محاكاة لكيفية اختيار المعلم البديل.
تنبيهات ذكية للمعلم وكذلك لمن يريد الاطلاع
في الإصدار v1.9.0 قمنا بربط النظام بـ Meta Business API، بمجرد ما يُسند احتياط، يوصل واتساب للمعلم البديل مع تفاصيل الاحتياط.
وفي الإصدار v2.1.0 أضفنا إمكانية ربط أي شاشة بواسطة API خاص تعتبر لوحة عرض حيّة للاحتياط بشكل مباشر وتحديث أوتوماتيكي.
فكرة وحدة خلف الواتساب والشاشة المعلومة تلاحق المعلم، مو العكس :)
تفويض بدون فقدان السيطرة
في الإصدار v2.1.0 أضفنا نظام المساعد، يقدر مسؤول الاحتياط يعيِّن مساعد بصلاحيات محددة، يساعده في عمليات إسناد الاحتياط اليومي.في نفس الإصدار، قمنا بإعادة هيكلة نظام العضويات
عضوية للأقسام الصغيرة 20 معلماً.
الثانية مدفوعة للمدارس الكبيرة حتى 200 معلمٍ.
والنظام يخاطب المعلم والمعلمة بشكل صحيح، تفصيل صغير لكنه يفرق.
أكو إصدار v2.0.0 صامت بين الإصدارين v1.9.0 و v2.1.0 ما كان علني، أحيانا أهم شيء تبنيه هو اللي ما يشوفه أحد :)
بدأت بجدول رقمي الآن صار نظام يفكر وما أدري وين بنوصل :)